Blogger豬仔包媽媽同豬仔包早前參加咗一個 親子 社區探索活動「香港世界牛奶日 x OHMYKIDS『童遊油麻地』」。豬仔包媽媽覺得呢個 親子 活動非常特別，係由小朋友做領隊，帶住爸爸媽媽去探索油麻地。

親子 活動開始前準備

喺活動開始前，參加者必須出席線上簡介會，畀小朋友初步了解油麻地嘅歷史同埋現況，仲詳細講解活動嘅玩法，最後會獲得通關密碼用嚟做解鎖任務，自行選定時間，各自到社區進行實體 親子 活動。活動期間用手機應用程式實時提交探索任務嘅答案，會即時取得分數同排名呀！

每位參加小朋友都會獲得「小領隊選手包」一份，內有「童遊小領隊」T-shirt、領隊「Follow Me」旗仔、毛巾、地圖等，最特別係有張「家長靜音模式貼紙」，家長唔可以提示，一於畀小朋友擔大旗做小領隊，帶領家長玩轉油麻地。個「小領隊選手包」仲附送子母產品，畀小朋友沿途補充體力，完成任務呢！

選定時間 出發前核對裝備

由於嗰段日子唔係落雨就係太陽好猛烈，所以豬仔包媽媽揀咗一個天朗氣清嘅黃昏同豬仔包出發。出發前，佢哋根據地圖上嘅檢查清單，逐一核對有冇帶齊裝備，跟住就搭港鐵出發前往油麻地。喺港鐵站裏面，媽媽同豬仔包一齊睇地圖，擬定路線，完成後就立即開始 親子 任務，由豬仔包帶住媽媽去探索。

由於平日媽媽帶豬仔包去街，搭港鐵都會畀豬仔包幫手搵出口，所以呢個搵出口任務對豬仔包嚟講毫無難度，仲攞住支「Follow Me」旗仔好有自信咁帶住媽媽行呢！

不過出到地面，豬仔包就非常迷惘，完全唔知點樣睇地圖嘅方向，所以極速就要出示「救命卡」，向媽媽求救，媽媽當然義不容辭，耐心咁教導豬仔包點樣分辨方向，例如可以透過街道牌、大馬路等去辨認方向，講解完一大輪，豬仔包明白後就再次出發。