行博物館可以動腦又動手！香港海事博物館將於10月28日免費開放，舉辦一系列親子活動，8大活動包括互動遊戲、攤位、手繪工作坊、海洋生物猜猜估估遊戲，俾大人小朋友開心學習海洋生態知識。

推廣海洋保育

香港海事博物館舉行嘅「太古親子同樂日」，將會推廣海洋保育，帶小朋友發掘及了解更多海洋生物知識。

製作貝殼聖誕裝飾

精選活動包括蠔礁工作攤位和「蠔礁修復與蠔礁生態價值」海洋工作坊，大家可以認識香港蠔礁修復工作，同埋透過VR虛擬實境裝置參觀白泥，進行貝殼繪畫和製作貝殼聖誕裝飾。而喺海洋工作坊上，大家可參與互動小手工製作，利用回收材料製造礁球。

3D打印珊瑚藝術作品

另一活動——珊瑚藝術攤位可以俾大家認識珊瑚生態知識及它們所面對的威脅，仲可以接觸到珊瑚模型和珊瑚骨骼標本，真係難得！大家可透過3D立體打印筆，設計獨一無二珊瑚藝術作品，仲可以帶返屋企留念。鍾意藝術嘅小朋友亦可參加手繪工作坊，畫上可愛嘅海洋動物、船隻或燈塔。

當日有講故事工作坊，工作坊以香港觀鳥會最新出版兒童繪本《魯魯詩詩歷險記 粉紅燕鷗的遷徙故事》為題，講述燕鷗遷徙之旅。

現場有「海洋生物猜猜估估遊戲」，小朋友要喺館內探索唔同遊覽路線，欣賞展覽和藏珍外，發掘更多關於海洋生態及本地海洋保育嘅工作。當日亦有五場海洋生態講座、 海洋關注組織遊戲與資訊攤位、「重塑海洋生命」展覽和導賞團，適合大人和小朋友。