小朋友平時睇醫生先接觸醫護人員，有時想更認識呢個行業都冇乜機會。伊利沙伯醫院將在12月3日舉辦社區健康嘉年華，專科醫生、護士同專職醫療人員等準備咗超過20個遊戲攤位，小朋友仲可以體驗「傷口縫針」、着醫生護士制服「打卡」，非常適合一家大小。

化身「迷你」醫生護士

今次嘉年華「重頭戲」非常適合小朋友，大會將會安排「迷你」醫生護士制服俾小朋友變身小小醫護打卡影相，仲可以參加模擬工作坊，親身體驗「傷口縫針」及「傷口護理」等日常工作，相信小朋友平日都好少接觸，呢個活動可從小培養小朋友對醫護行業嘅興趣。

現場表演炒熱氣氛

伊院亦邀請到唔同社區團體，為大家表演弦樂、軍鼓、歌唱、空手道及無伴奏合唱等等。參加者會獲得一張「Q版員工證」，完全帶大家「入戲」做醫護。

參加攤位遊戲獲得指定數量貼紙後，可以得到伊院 60周年限量禮品，包括杯墊、匙扣等等，十分精美！