fbpx
免費親子農耕體驗半日營 DIY蛋殼杯墊/初嘗有機農耕

Blogger豬仔包媽媽同豬仔包早前參加咗一個由都市綠洲 Urban Oasis及心靈綠洲 Serene Oasis主辦嘅「親子半日體驗營」。呢個係「綠色生活@3H療癒行動」計劃嘅活動,獲得滙豐香港社區夥伴計劃 HSBC HK Community Partnership Programme 資助 ,所以費用全免!

活動分為3個部分,包括:
.園藝治療花園參觀導賞
.植物手工藝
.農務初體驗

1.植物手工藝

當日佢哋進行第1個活動係「植物手工藝」環節,導師教導參加者利用食完唔用嘅蛋殼升級再造,製作成「環保蛋殼杯墊」。首先響白紙上設計圖案,之後在蛋殼上塗上自己喜歡嘅顏色,在杯墊再塗上膠水,就可以將有顏色嘅蛋殼按自己嘅設計,逐少逐少進行拼砌,咁就完成獨一無二又靚嘅「 環保蛋殼杯墊」啦。


製成品除咗可以用嚟裝飾,亦可以當杯蓋或杯墊使用,仲可以當禮物送比朋友添。

2.農務初體驗

第2個活動係「農務初體驗」,導師讓小朋友體驗有機農耕,由翻土、播種、施肥、淋水,逐個步驟都詳細講解同教授技巧,讓小朋友感受到農作物得來不易,從中了解保護土地及大自然的重要性。

活動過程仲有個小插曲,有小朋友響泥度掘出一條長長嘅蚯蚓,導師問邊個想試摸,豬仔包第一個就衝出去,之後到施肥用嘅雞屎,豬仔包又係膽粗粗第一個試摸,果然係「敢死隊」!

3.園藝治療花園參觀導賞

體驗完耕種之後,佢哋就去到最後一個環節「 園藝治療花園參觀導賞」,導師帶住所有人圍繞「 都市綠洲」,參觀不同田位租戶嘅園圃,種植嘅種類真係非常多,有藍莓、火龍果、香蕉、車厘茄、茄子、白蘿蔔、辣椒、粟米等,仲有斑蘭香葉、紫蘇葉、蘿勒、有山葵香味嘅金蓮花等,真係大開眼界。園內有專為老人家同輪椅人士嘅設施,等佢哋可以唔駛彎低腰同無障礙咁享受種植嘅樂趣。

整個活動可以令市民體驗農耕、放鬆情緒,從而達致身心靈健康,更能關注環境 問題,實踐 綠色生活 ,非常適合一家大細參與,響嚟嘅4月同5月仲有好多不同工作坊,包括 天然到手香蚊膏、 插花藝術同 物驅蟲包有興趣嘅朋友不妨同報名參加。

報名連結:https://forms.gle/KAtsoVpbTY1hwTwdA

資料內容及相片獲 豬仔包の開心日常 專頁授權轉載

[]